ጥቅምት 11/2014 ዓ.ም

የገቢዎች ሚኒስቴር “ግብር ለሀገሬ” በሚል መሪ ቃል 3ኛ ዙር የፌዴራል ግብር ከፋዮች የዕውቅና ስነስርዓት ጠቅላይ ሚኒስትር ዓብይ አህመድ፣ የክልል ርዕሳነ መስተዳድሮች፣ የሃይማኖት አባቶች፣ የታክስ አምባሳደሮች እና ባለድርሻ አካላት በተገኙበት ተካሂዷል፡፡

ጠቅላይ ሚኒስትር ዶ/ር ዓብይ አህመድ በእውቅና ስነ-ስርዓቱ ላይ ለተሸላሚዎች የእንኳን ደስ አላችሁ እና የምስጋና መልዕክት አስተላልፈዋል፡፡ ግብር መክፈል ሀገር የመውደድ፣ ራስን የማክበር፣ ነፃነትን የመሻት ውጤት ነው ያሉት ጠቅላይ ሚኒስትር ዓብይ ግብር ከፋዮች ከታማኝነት ባሻገር ሌብነትን በመዋጋት ከመንግስት ጋር ሊሰሩ እንደሚገባ አሳስበዋል፡፡

የገቢዎች ሚኒስቴር አቶ ላቀ አያሌው በበኩላቸው “ግብር መክፈል የሀገር ፍቅር መገለጫ የሚሆነው በፍቅርና በንፅህና ሲከፈል” ብቻ ነው ብለዋል፡፡ ግብርን በአግባቡና በተገቢው መንገድ መክፈል ትንሹ አገራዊ መስዋዕትነት፣ የዜግነት ክብር መገለጫና ለትውልድ አሻራ ማስቀመጫ የባለቤትነት ዕድል እንጂ የግብር ከፋዩን ማህበረሰብ መቅጫና መቅረጫ ህግ አለመሆኑን መገንዘብ ይገባል ብለዋል ሚኒስትሩ፡፡

ግብራቸውን በታማኝነት የሚከፍሉ እንዳሉ ሁሉ በግብር ስወራ የተሰማሩ፣ የሚጠበቅባቸውን ቀረጥና ታክስ ላለመክፈል ያገኙትን አጋጣሚ የሚጠቀሙ መኖራቸው የጠቆሙት አቶ ላቀ ህገ-ወጦችን ለማስተካከል የሁሉም ጥረት የሚጠይቅ መሆኑን ገልፀዋል፡፡ ሚኒስቴር መስሪያ ቤቱ ከሌብነት ጋር በተያያዘ ከህብረተሰቡ የሚደርሱትን ጥቆማዎች ተቀብሎ እርምጃ የሚወስድ መሆኑን አረጋግጥላችኋለሁ ብለዋል፡፡